ازيك عامل ايه مره تانيه معاك فيصل عبد الواحد و تسجيل جديد من سلسلة ما قل و كفى
الحقيقه دلوقتى بعد ما انت بفضل الله عرفت الحقيقه الى انت المفروض تعامل بيها ربنا و النظره الى المفروض تبص بيها لربنا و بفضل الله بعد ما حفظت من القرآن حتى ولو عشر آيات حتى لو كنت بتحفظ كل يوم آيه حتى لو آيتين بعد كمان ما انت بفضل الله تلتزم بالصلاة و انت مش ملتزم بدات تصلى سنن لو كنت بتصلى فرائض بس بدأت تصلى قيام ليل المهم تقدمت احمدلله و عدا وقت جميل جدا ارجو ان انت تكون عملت الى احنا اتفقنا عليه و لو مكنتش عملت مش مشكله ابدأ من دلوقتى
حتى لو عديت ال10 ايام دول و انت معمتلش حاجه مش مشكله تطلع ب20 يوم احسن ما تطلع بولا شيء
فالنهارده الخلق الى احنا هنتكلم عليه هى السلسله كلها قائمه زى ما انت عارف ان احنا هنتحلى بخلق يومى و كل يوم نحفظ آيات و نتدبر فيها و نصلى بطريقه الخشوع الى احنا اتكلمنا عنها قبل كده
الحقيقه دلوقتى انا بسجل ده فى وقت صلاة الفجر وقت جميل جدا فسبحان الله مناسب جدا لموضوع التسجيل بتاع النهارده
النهارده هكلمك على انك تبتدى تعمل ايه ؟ عايز اقولك انت اتخلقت ازاى او اتخلقت ليه ؟؟ سبحان الله انت كأنسان تجلى للرحمه تجلى لرحمة ربنا بمعنى ربنا بيقول فى القرآن ( الرحمن علم القرآن خلق الإنسان ) صفته الرحمن خلقك بصفته الرحمن مختارش اسم تانى مختارش مثلا الجبار او مختارش المتكبر متخارش العزيز ولا القوى مختارش اى اسم الا الرحمن اى صفه الا الرحمن عشان انت تكون فائض من الرحمه دى كأنسان مسلم مؤمن موحد بالله لا اله الا الله انك تكون رساله للرحمه دى انك تكون رحيم
لذلك سبحان الله سيدنا محمد علياه الصلاة و السلام ربنا بردو قال اختار الكلمه دى عن اى كلمه تانيه و ما ارسلناك الا رحمة للعالمين مقالش وما ارسلناك الا هدايه مقالش الا ارشاد مقالش الا بشرى للعالمين مقالش كده وما ارسلناك الا رحمة للعالمين و انت كواحد مسلم رسول من رسل الاسلام و انت كإنسان رسول من رسل الله
فإنت اصلا رحمه الى انا هعلمهولك او هكلمك عنه النهارده مش حاجه جديده الرحمه دى ربنا شالك منه 99 جزء يوم القيامه عشان يرحمك بيها و الرحمه مذكوره فى القرآن 17 مره ضعف آيات العذاب و الوعيد الى آخر هذه المصطلحات
فصفة النهارده هى الرحمه انك تكون رحيم و هى صفة معروفه عن سيدنا محمد عليه الصلاة و السلام و سنه معروفه عنه يعنى سبحان الله احد مواليه كان بيقول فيما معناه لم ينهرنى رسول الله يوما عن شيء فعلته او شيء لم افعله اذا تتبعت حتى القصه دى ان هو اذا كان الشخص ده او الخادم ده او المولى ده بيوقع اناء او يكسر قدر او حاجه و كان اهل البيت احد من زوجات النبى ينهره يقوله عملت كده ليه او خلى بالك سيدنا محمد عليه الصلاة و السلام كان يقول دعوه فلو لم يكن مقدرا له ان يقع ما وقع سبحان الله
فانت رحمه انا مش عايز اتكلم فى الجزئيه دى كتير و الرحمه ممكن نقعد نتكلم عليها من هنا لبكره بس الى انا عايزك تبتدى تعمله النهارده انك تخلى صفتك من النهارده ان شاء الله طول حياتك انك ترحم تخلى صفتك انك ترحم يعنى ايه ؟
اول حاجه ارحم نفسك من حاجه تعباك ارحم نفسك من حاجه شاغله تفكيرك صدقنى والله التفكير عمره ما بيعمل اى حاجه خصوصا و انت فى تردد المشكله زى ما قولتك مش هتكلم عن الطاقه كتير فى رمضان او فى تسجيلات ما قل وكفى لكن صدقنى التفكير مش هيأدى الى اى شيء فى الوضع الى انت فيه من المشكله دى فأرحم نفسك من التفكير
حاجه تانيه كمان و تعتبر مهمه جدا ارحم شخص ارحم منك انت قادر تنفس غضبك فيه او قادر انك تاخد حقك منه ارحمه اختار ان انت كل مره كده كل 10 مرات يا سيدى حد غلط فيك و انت دلوقتى بقيت موقع ان انت تنفذ العقاب او تاخد حقك منه او ربنا مكنك منه بأى وسيله سواء هو جالك و قالك الى انت كنت هتعمله انا هعملهولك او الناس اجتمعت عليه و غلطته و قال ان هو لازم يعوضك حتى اعتذرلك و طلب و انت فى ايدك تطلب منه حاجه معينه عشان الموضوع ينتهى
المهم ربنا بشكل من الاشكال مكنك منه فى الوقت ده اختار انك ترحمه اختار ان انت تكون رحيم
حاجه كمان مهمه اختار انك ترحم والدك و والدتك حتى و هما غلط من وجهه نظرك امال هى اسمها رحمه ازاى هترحمهم و هما صح ؟ فحتى لو هما غلط جدا فى شيء يخصك معلش على اد ما تقدر اختار انك ترحم على اد ما ترحم اختار ان انت متنفذش غضبك ده متعيش صوتك اذا ربنا قدرك لسبب اولاخر علىحد فيهم سواء والدك او والدتك صدقنى ربنا مش هيقدرك عليهم حبا فيك و كرها فيك ربنا هيقدرك عليهم كنوع من انواع الابتلاء فأرحم والدك و والدتك حتى و هما غلط ارحم زوجتك
فى موقف كده انت قادر تزعقلها و هى غلطانه اختار انك ترحمها ارحمى ابنك المواقف كتير جدا المهم اختار ان الرحمه ان شاء الله تكون هى طريقك من النهارده و انك تكون رحيم على اد ما تقدر و صدقنى هتفرق معاك المرحله الى جايه
انا اختارت اليوم ده بالذات عشان اما احنا بدان نقرب من ربنا افتره الى فاتت بدانا نحبه هتبدأ بشكل تلقائي بدون ما تفكر اصلا تحب الناس الى حواليك هتبقى الرحمه هنا اسهل مقارنة ان احنا لوكنا بدانا بالرحمه على طول هتبقى الحكايه مش حاسسها انما دلوقتى و انت قريب من ربنا و شايفه بالطريقه الى اتكملنا عنها قبل كده و بتحبه هتبقى الرحمه سهله اوى مش هتعمل اى مجهود هتبقى اختيار بس
ارجو ان انا اكون وصلتلك رساله النهارده و ارحم مش عايز اجبهالك من حتة من لا يرحم لا يرحم و طبعا حديث موجود بس مش عايز اجيبها من الجزئيه دى عشان متركزش ان انا عاملها عشان حاجه ارحم بس و دع التقدير لله
مره تانيه بشكرك انك كملت معايا ال8 دقايق دول و اشوفك فى تسجيل جديد ان شاء الله
فيصل عبد الواحد