مجاناً – الحرية لا تحتاج لأي مجهود – فيصل عبد الواحد

بسم الله و الصلاة و السلام علي سيدنا رسول الله

ازيك عامل ايه فيصل عبد الواحد معاك و لو دى اول مره تسمعنى انا زى ما قولتلك دلوقتى اسمى فيصل عبد الواحد انا ان شاء الله ان انا اكون اول واحد ادخل التحرر فى الوطن العربى و ادخل سيدونا فى الوطن العربى و تقنية للتحرر مختلفه من فتره طويله اوى يمكن من يعنى 2009 تقريبا بدأت اتكلم عنها بقى على انتشار اكتر من بعد كده بدات اعلمها للناس بقى 2010 و 2011 ف ان شاء الله دى مش شطاره منى خالص هو فضل من ربنا وحده انى اكون دخلت تحرر سيدونا فى الوطن العربى  من وقتها جيت فتره كده حبيت ان انا يعنى ديما لو انت عارفنى هتعرف انى بحب ادخل نفسي فى ظروف صعبه او اخلق حواليا ظروف صعبه عشان اجرب الى ربنا بيعلمهونى مبحبش اسيب اى احتمال للى احنا بنقوله صدفه  صدفه ان فلان ده يتصل بيك فى نفس الوقت صدفه ان فلوس تجيلك وقت ما كنت محتاجها ف كنت بصعب الظروف عليا جدا جدا فى حاجات انت ممكن متتخيلهاش و مواقف انت ممكن تشوفها استحاله ان انت تخش فيها اصلا زى ان انت مثلا تبات فى الشارع او ان انت تسافر دوله متعرفش حد فيها و الكروت بتاعتك كلها بتاعه البنوك واقفه و زى ان انت تسافر دوه و مافيش مكان تسافر فيه

يعنى كنت بحط نفسي فى حاجات صعبه اوى و منها ان انا جيت فتره وقفت التدريب خالص كان فى حاجات ربنا علمهانى كان لازم اتأكد منها لوحدى و انا منقطع عن الناس و انا بعيد عن التدريب و انا حتى بعيد عن اهلى كنت بعيد عن اهلى و بعيد عن فريق العمل حتى الشركه كنت قفلتها خالص مكنتش عايز اى عتبه استند عليها ان انا يعنى ارجع ليها تانى لو الى انا ربنا علمهونى ده منجحش ف يعنى حطيت نفسي فى وضع صعب جدا و بفضل ربنا الحمدلله وحده هى مش شطاره منى ولا تميز منى على اد ما هى فضل من ربنا الى ربنا علمهونى نجح فى اصعب الظروف و بفضل ربنا وحده ممكن تدخل تشوف قصص النجاح على اليوتيوب و التعليقات او فى صفحات بيع الكورسات او عندى على الفيس بوك او فى اى صفحه من الصفحات على الفيس بوك عندى بردو

انا بقولك الكلام ده ليه مش عشان اتباهى  عشان اقولك ان انت الى بيكلمك دلوقتى بيتكلم عن حاجات هو عارفها رغم ان انت ممكن تلاقى ناس بتقلدنى كتير اوى او بتقلد طريقة كلامى حتى بالنفس لكن الفرق بينى و بين اى مدرب تانى هى ان انا بتكلم من حاجه انا ربنا بيعلمهانى و بعيشها مش بتكلم من كورس او من كتاب قريته

ف انا اسف لو كنت ممل الثلاث دقايق دول او الاربع دقايق دول انا بس حبيتك تعرف ان انت مع حد زى ما بيقولوا كده فى ايد امينه  انت بتسمع حد عارف هو بيقول ايه و انا مش عايزك تصدق الى بقوله خالص ديما متصدقش حاجه انا بقولها و متكدبهاش و جرب الى انا بقوله و شوف هيحصل معاك ايه وقتها هتعرف اذا كانت الثلاث دقايق دول منى صح ولا مبالغه منى ولا كلام مش حقيقي ولا اي كان

عايز قبل ما اتكلم معاك فى اى حاجه  عايز اقولك على حاجه كويسه جدا او اعمل معاك حاجه كويسه جدا

و انا اظن الى بيسمعنى دلوقتى حد عنده مشاكل فى مشاعر او فى افكار خلينا ديما لما نتكلم داخليا هنتكلم على مشاعر مش افكار  ليه ؟ لان الشعور الواحد ممكن ينبع منه مئات الآلاف من الافكار بدون مبالغه ف لو قعدت كل فكره يعنى حتى تعمل معاها الى احنا هنعمله دلوقتى ده  هتاخد وقت طويل اوى  انا بقولك مئات الآلاف من الافكار  انما لو شوفت هتلاقى افكار كتير نابعه من نفس الاحساس ف ديما هتلاقينى بقول فى  التسجيل ده ع الاقل داخليا اعرف ان انا بتكلم عن مشاعر يعنى احسن ليك ان انت تشتغل ع المشاعر احسن من تنك تشتغل على الافكار

او حد عنده مشاكل مع المشاعر او الاحاسيس او حد عنده مشاكل خارجيه و ديما انا بردو يعنى هى عاده  كده من فضل ربنا ان انا لما بتكلم عن حاجه تنتشر كتير و غيري  يتكلم عنها بعلم او بدون علم ف احنا اتكلمنا عن حاجه قبل كده اسمها الجنه الداخليه

الجنه الداخليه دى حاجه مش محتاجه مجهود حاجه مش محتاجه وقت وانا النهارده مش  هديهالك مافيش حد يقدر يديلك الجنه الداخليه لان هى انت هى موجوده فيك ف لو قولتلك هديهالك و انا المدرب الواو يبقى بكذب عليك  فهى فيك  بس انا هاقولك على حاجه النهارده هى حاجه جميله اوى

هاقولك على حاجه تعملها معايا و زى ما قولت متصدقنيش و متكدبنيش  شوف الى هيحصل ايه  انا عايزك بس تعمل معايا الى هاقوله دلوقتى لمدة دقايق معينه اتفقنا و هتفاجأ هنشوف بعد كده او خلال الدقايق دى هتفاجأ ولا مش هتفاجأ

ف عشان الناس كلها تشتغل معايا دلوقتى سواء الى عنده مشكله داخليه فى المشاعر زى ما قولنا او الى عنده مشكله خارجيه فى وضع ما  اه نسيت اقول ان بأذن الله اذا انت هدف الجنه الداخليه  ان شاء الله كل الاهداف التانيه هتحصل  بس متستهدفش ده يعنى متستهدفش ان الاهداف الخارجيه هتحصل بس  استهدف الاهداف الداخليه و اى حاجه تانيه هتحصل بعدها

مش معنى كده ان انا بقولك ازهد فى الحياه بالعكس خالص و هنا ده خطأ الى احنا فهمناه غلط سواء بسبب تدريب من ناس مش فاهمه هى بتقول ايه او فهم خاطيء  او عدم فهم صحيح من جانبنا ان احنا كنا بنقرأ قصص الناس و نشوفهم زاهدين فى الدنيا و نفهم ان احنا كده نبتعد عنها و ده غلط  هو لازم الميزان ان انت بتكلم بالنسبه للجنه الداخليه ان انت لما تستهدف الجنه الداخليه و تنسي كل حاجه تانيه خالص لازم غصب عنه هيجو اذا  مجوش مالكش دعوه متفكرش فيهم و الناحيه التانيه مينفعش تكرهه الحياه او متقولش انا مش عايز يبقى معايا فلوس عشان متفتنيش او مش عايز اتجوز عشان ... الكلام الغير حقيقي ده و ده حصل حتى ايام سيدنا محمد كان بينهى عن الكلام ده  صلى الله عليه وسلم

اقرأ قصه سيدنا  عثمان ابن مظعون ربنا يرضى عنه و هتفهم الكلم ده بدون ما نضيع الكلام اكتر يعنى ف هنخش فى الموضوع على طول فنقطه مهمه قبل ما نخش فى الى احنا هنعمله انا اسف انا اتكلمت كتير بس عشان ابقى ضمنت كل الناس الى بتسمعنى و مافيش واحد بس يسمع و مش يستفيد من الاستماع

حابب انى اقول ان سواء هتشتغل على احساس داخلى او على واقع خارجى الواقع الخارجى ده انت بتفسرها عن طريق مشاعر يعنى اذا مشكلتك مثلا مع زوجتك مثلا ف انت فى احاسيس فى احساس ان زوجتى  مثلا عدم الاحترام او احساس مراتى بتهينى او احساس ان مراتى بتخونى او احساس ان الولاد مبيسمعوش الكلام او احساس ان مصاريف البيت مش مكفيه لو هدف مادى الاحاسيس كتير 

او لو انت بقى هتتعامل مع احاسيس داخليه  هنا مش محتاجين كلام انت فعلا عارف الاحاسيس

ف انا عايزك دلوقتى خد نفس كده و عايزك جربتبص معايا على الاحاسيس ان هى مش بتاعتك يعنى جرب تبص معايا على اى احساس جواك انت عندك مشكله معاه احساس العجز المادى  احساس خوف من شيء ما احساس غضب اى كان احساس حقد احساس حسد جرب تبص على الاحساس ده و انت بعقلية او بتفكير ان دى مش احاسيسك بس بص عليها بس كده  خد دقايق معايا  بص على كل الاحاسيس ممكن تمسك وضع وضع و تعمل ده دلوقتى انا هاعمل ميوت بس التسجيل هيفضل لكن عايز اعمل ده معاك خمس دقايق على الاقل بص على كل احاسيس انها مش بتاعتك اى كانت

تمام  ايه الى حصل دلوقتى لما انت جربت ده  اى رغبه فى التغيير اكيد مبقتش موجوده صح مبقتش حتى محتاج تتحرر مظبوط ... اى احساس كان عاملك مشكله معدش عاملك مشكله و طبعا طالما الاحاسيس دى معدتش عملالك مشاكل بالتبعيه كل الافكار الى نابعه منها بردو معدتش هتعملك مشاكل و سواء جربت على احساس داخلى او شيئ متعلق بهدف خارجى انت حاسس بأيه دلوقتى  حاسس انك حر و دى مش حياتك دى تعملها حاجه ليه تعمل للمشاعر دى او للاحاسيس دى حاجه ليه  ليه تعملها حاجه و دى حاجه اتكلمت  عنها من زمان ( لا تفعل شيء ) بقالى سنين  كتير اوى بتكلم عليها انا حبيتك تشوف بنفسك الى انا بقوله صح ولا غلط انا حابب ان انت تعيش كده حابب تجرب تعيش كده و اذا كنت شايف ان حياتك اتغيرت دلوقتى ف اضمنلك تابعنا الايام الجايه و الفيديوهات الجايه و حياتك هتتغير اكتر بكتير ان شاء الله

اشوفك التسجيل الجاى و اذا انت ماكنتش لسه اشتركت دخل ايميلك عشان التنيه يجيلك اول ما الفيديو الجديد ينزل ان شاء الله  و كمان عشان تجيلك نسخه من التسجيل ده على ايميلك تسمعها وقت ما انت حابب و تسمع كل التسجيلات التانيه وقت ما انت حابب اشوفك فى التسجيلات التانيه ان شا ءالله

فيصل عبد الواحد