ازيك عامل ايه اهلا بيك فى تسجيل جديد من كورس جذب المال
زى ما انت عارف انا بعمل تسجيلات صغيره عشان نوعا ما عارف ان الشخص الى عايز جذب المال ده بيبقى صعب ان هو يقعد فتره كبيره يسمع تسجيل معين فأنا بعمل تسجيلات مدتها قصيره بس فى حاجات ممكن تلاقينى بطول فيها عشان مينفعش تقل عن كده
النهارده هتكلم معاك عن الخوف من الرفض او تقدر تسميه مثلا الخوف من الفشل يعنى ايه ؟
فى حاجات جواك بتبقى خايف تاخد خطوه عشان خايف تفشل زى ما اتكلمنا قبل كده عن الخوف من النجاح بتكون خايف تاخد خطوه او تعمل حاجه تكون تؤهلك لنجاح عشان مكن تكون خايف من المسؤليات المتربته عليه و انت مش واخد بالك
النهارده العكس ممكن تكونى خايفه تاخدى خطوه لقدام او تعملى حاجه لمشروع معين او حاجه ناحيه موضوع ما عشان خايفه من الفشل
و كمان لاحظت فى كل التسجيلات الى قبل كده مش بعمل معاك التمرين انا لو عملت معاك التمرين وقته مش هيقل عن 25 دقيقه غير الشرح وانا مش عايز الشرح يطول عشان انت متزهقش و كمان عشان مساحة التسجيل متبقاش كبيره عشان تبقى سهله عليك فى التحميل بأذن الله
كنت بقولك ان انت تبدأ تعمل التقنيه الى اتدربنا عليها فى الأول خالص لغايه ما توصل لمرحلة ان جسمك كله تحس انه بيشع بالنور الآلهى ده بفضل الله وحده و تبدأ تطلب من النور ده انه يشفى و يعالج و يحرر بأذن الله كل حاجه جواك او كل احساس جواك كل معتقد جواك مخليك حاسس بالخوف من الفشل او الرفض او زى ما تكون حاسس انك فى سجن او اى حاجه مقيداك اطلب من النور الآلهى ده وحده انه يشفيها و يحررها بأذن الله على كل المستويات و الابعاد ملايين المرات عايزك تعمل الحكايه دى على الاقل مرتين اعمل التقنيه كلها مرتين تطلب من النور الآلهى ده بأذن الله وحده انه يشفى و يعالج و يحرر المعتقدات و السلبيات و الافكار و الاحاسيس الى جواك الى مقيداك و مخلياك مش قادر تاخد خطوه لقدام ملايين المرات على مختلف المستويات و الابعاد بأذن الله
النهارده هتكلم معاك على حاجه مختلفه شويه انت بتعمل ايه فى العالم ؟؟؟ الناس بتشوفك ازاى ؟
فى نظريه بتقول و انا من الناس الى مؤمنين بيها نوعا ما ان احنا كلنا ربنا نفخ فينا من روحه فأحنا مصدرنا واحد فى نظريه بتقول ان كل الاشخاص متصلين بالطاقه انا و انت متصلين بنوعا ما طاقيا انتى و صاحبتك فى بينكوا اتصال طاقى نوعا ما لذلك لما بتروح لأبعد من كده و تقول ان اى صفه انت بتشوفها فى شخص ما مش عجباك انعكاس لجذور الصفه دى فيك يعنى انت مثلا شوفت واحد بخيل مثلا فده انعكاس لجذور البخل ده جواك حاجه انت مش عايزها جواك فظهرتلك و جذبت ليك شخص ما فيه الصفات دى
مش عايز اتعمق معاك فى النظريه دى عشان هتاخد وقت كبير فى الشرح لكن بأختصار انت الناس بتشوفك الناس او بتطلع طاقتك او مساهتمك فى العالم ده ازاى ؟
عايزك تبدأ تسأل نفسك ايه المطلوب منى او ايه المطلوب ان انا اعمله عشان احس بالوفره و احس كل حاجه عايزها بتجيلى اكتر من الى انا عايزه يعنى ايه ؟؟
انا اقدر اعمل ايه عشان احس ان كل حاجه انا عايزها حواليا ؟؟
ياريت اجابتك متكونش حاجه خارجيه يعنى متكونش يبقى معايا فلوس كتير او حواليا كل الناس الى عايزهم يبقوا موجودين ياريت اجابتك تكون حاجه داخليه هنعرف ازاى انها حاجه داخليه ازاى ان شاء الله بعد كده
تانى حاجه عايز تسألها لنفسك ايه المطلوب منى اعمله عشان اعيش الحياه الى انا عايزها بالظبط ؟؟
ثالث حاجه عايزك تسألها لنفسك ايه المطلوب اعمله عشان اجذب الحاجات الى انا عايزها بفضل الله ؟؟
رابع حاجه عايز تسألها لنفسك و دى الى كنت بقولك عليها ده داخليا ايه التردد الطاقى الى انت تكون فيه عشان تجذب كل الى فات ده ؟؟
يعنى ايه ؟؟
طبعا انت اكيد متابع امير نفسك و اكيد ممكن تكون خدت كورس قبل كده ان كل حاجه ليها تردد سواء الفكره جواك او الاحساس الى جواك و الفكره الخارجيه الى انت عايز تجذبها فلما بيحصل تشابه بين تردد الحاجتين دول الداخليه و الحاجه الخارجيه بتنجذب حتى فى كلمة بتقول " دائما عيش فى الترددات الطاقيه دلوقتى الى انت عايز تجذبها فى المستقبل " يعنى لو فى هدف معين انت عايز تجذبه نوعا ما فى المستقبل و ليكن مثلا 100 الف دولار شوف الهدف ده التردد بتاعه ازاى و عيش فى دلوقتى
طيب انا ازاى يا فيصل اعرف التردد ده ؟
ببساطه جدا حس بالظبط و عايز هنا اتكلم معاك عليها لان فى ناس بتفهمها غلط لما انا بقول حس الاحساس الى انت هتحسه يعنى هشوف النهارده مثلا يوم معين بالتاريخ بتاع النهارده مثلا الاثنين 28/1/2009 مثلا ان فى اليوم ده اتمتلكت الهدف ده و اشوف هحس بأيه لغايه كده ممكن الناس تفهم لكن فى حاجه الناس ديما بتفهمها غلط لما انا اقولك شوف هتحس بأيه ان انت لازم بتبقى عايز تحط توصيف للأحساس ده تقول مثلا اما بسأل واحد مثلا فى كورس او متدرب اقوله عايزك تحس الى انت هتحس بيه لما تمتلك الهدف ده دلوقتى هتحس بأيه ؟؟ يقوم قايل السعاده او الراحه انا مش بطلب منك انك توصف الاحساس فى ترددات معينه مش هتقدر تكتبلها اسم او توصفلها اسم معين الترددات بتختلف بالأسم و الطاقه بتاعتها فمش لازم اما انا اسألك السؤال ده انت هتحس بأيه بالظبط اذا كان معاك هدفك دلوقتى او لو انت حققت هدفك دلوقتى حالا مش لازم تقول هحس بالسعاده او السلام او الراحه او الفرحه او الحريه الماديه كل ده مش لازم بالعكس كون انك بتدور على اسم انك بتحاول تحط توصيف غلط للطاقه الى جواك
عايزك بس تحس الاحساس تشوف الاحساس الى انت هتحسه لو معاك ال100 الف دولار دول دلوقتى و تحس دلوقتى اى كان بقى بغض النظر انت هتوصف الاحساس ده ولا لأ
فدى اهم حاجه تعرفها انك مش لازم او مش حتى مش لازم ياريت متحاولش تجيب اسم للأحساس ده
فأتفقت معاك تشوف ايه الحاله الشعوريه او التردد الطاقى الى انت تكون فيه عشان تجذب الى انت عايزه بأذن الله
كمان عايز انصحك حاجه كويسه انك على اد ما تقدر النقطه الى هاقولها دلوقتى هتسهل عليك الحكايه دى
ايه التردد الطاقى للحاجه الى انا عايزها عشان توصل للتردد الطاقى المثالى للحاجه الى انت عايزها تبدأ تشوف فعلا فعلا زى ما بنقول كده المعجزات حواليك مش عايزك تعمل الاحساس ده او انك تعيش التردد الطاقى ده فتره قليله عايزك على الاقل 20 دقيقه فى اليوم انا عارف انه ممكن يكون وقت كبير ليك خاصة انك شخص على فكره كلمة مادى مش عيب يا جماعه ممكن انا اكون شخص مادى و مخجلش ان انا اقول كده مادى دى مش معناها انى بحب الفلوس عن الناس الفلوس يا جماعه هى مش حاجه وحشه عشان نعترف بيها الفلوس هو عصب الحياه و المال هو عصب الحياه حتى القرآن بيقول " المال و البنون زينة الحياه الدنيا " فمش معنى انك تكون عايز مال انك شخص الناس ممكن تكون شيفاك وحش وللأصف كلنا بدون استثناء جوانا جذور من حاجه زى دى ان احنا بنخاف او نتحرج اننا نقول ان انا شخص مادى انا شخصيا كان جوايا مشكلة زى دى لكن مبقتش اتحرج لان مش حرام لان شخص مادى معناها ان انا شخص بحب الفلوس و بفضل الفلوس عن الناس و الكلام ده كله
فالمهم شوف التردد الطاقى للحاجه الى انت عايزها دى ايه زى ما كنت بقولك ممكن تكون شخص عايز او عشان خدت جزم اما يكون الهدف الاساسى فلوس فممكن تكون ال20 دقيقه دول كتير ليك بس صدقنى ال20 دقيقه دول هترجع انت بعد كده تقول يا ريتنى خليتهم نص ساعه يا ريتنى خليتهم ساعه فى اليوم لان لما هتشوف ان شاء الله و تقعد كل يوم طبعا بعد ما تعمل تقنيه التحرر الى اتدربت عليها اما تعمل 20 دقيقه فى التردد بالظبط الى انت عايز تكون فيه صدقنى هتلاقى فعلا المعجزات و مش عايز اقول كلمة سحر عشان مش بحب كلمة سحر بس هتلاقى المعجزات بتحصل حواليك بأذن الله
النهارده اسف لو كنت طولت عليك شويه عن الوقت المعتاد للتدريبات دى بس زى ما بقولك ابدأ شوف انت الناس بتشوفك ازاى ؟ و ابدأ شوف ايه التردد الى المفروض توصله عشان تبدأ تيش فيه ان شاء الله
تحياتى ليك و اشوفك التسجيل الجاى بأذن الله